പെരിങ്ങോട്ടുകര: ചെമ്മാപ്പിള്ളി – നാട്ടിക തൂക്കുപാലത്തിന് സമീപം വഞ്ചിയിൽ നിന്ന് കനോലിക്കനാൽ പുഴയിൽ വീണ യുവാവിന്റെ മൃതദേഹം കണ്ടെത്തി. നാട്ടിക ചെമ്മാപ്പിള്ളി കോളനി സ്വദേശി കടവത്ത് വീട്ടിൽ കൃഷ്ണദാസിന്റെ മകൻ കൃതീഷിൻ്റെ(32) മൃതദേഹമാണ് വെള്ളിയാഴ്ച രാവിലെ 6.30 യോടെ തൂക്ക് പാലത്തിൻ്റെ തെക്ക് ഭാഗത്ത് നിന്നും കണ്ടെത്തിയത്.
വ്യാഴാഴ്ച വൈകീട്ട് നാലുമണിയോടെയാണ് നാട്ടിക ചെമ്മാപ്പിള്ളി കടവിൽ നിന്ന് സുഹൃത്തിനാപ്പം വഞ്ചിയിൽ യാത്ര ചെയ്യുന്നതിനിടെ കൃതീഷ് പുഴയിൽ വീണത്‌. വിവരമറിഞ് സ്ഥലത്തെത്തിയ വലപ്പാട് പൊലീസും,നാട്ടിക ഫയർഫോഴ്സും ഏറെ നേരം തിരച്ചിൽ നടത്തിയെങ്കിലും കൃതീഷിനെ കണ്ടെത്താനായില്ല. രാത്രിയായതോടെ തിരച്ചിൽ അവസാനിപ്പിക്കുകയായിരുന്നു. ഇതിനിടയിലാണ് ഇന്നു രാവിലെ മൃതദേഹം കണ്ടെത്തിയത്. മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി.
