കണിമംഗലം: ഭാര്യയുമായുള്ള തർക്കത്തെ തുടർന്ന് വീട്ടിലെ സാധനങ്ങൾ തീയിട്ട ഭർത്താവ് അറസ്റ്റിൽ. കണിമംഗലം വർക്കേഴ്സ് നഗർ സ്വദേശി കങ്കമത്തിൽ ബാബുരാജ് (42) ആണ് അറസ്റ്റിലായത്. ബാബുരാജിന്റെ ഭാര്യ രാധയുടെ പരാതിയിലാണ് പോലീസ് ഇയാളെ അറസ്റ്റ് ചെയ്തത്. ഇക്കഴിഞ്ഞ 28നായിരുന്നു സംഭവം. ബാബുരാജിന്റെ ഭാര്യ രാധയും മക്കളും പഴനിയിൽ പോയി തിരിച്ച് വന്നപ്പോഴാണ് വീട്ടിലെ സാധനങ്ങൾ തീയിട്ട നിലയിൽ കണ്ടെത്തിയത്. നിരന്തരമായി ഭാര്യയെ മർദിക്കുകയും വധഭീഷണി
മുഴക്കുകയും ചെയ്തതിനെ തുടർന്ന് കോടതിയുടെ സംരക്ഷണ ഉത്തരവിലാണ് രാധയും മക്കളും കണിമംഗലത്തെ വീട്ടിൽ കഴിഞ്ഞിരുന്നത്. വസ്ത്രങ്ങൾ, മകളുടെ സർട്ടിഫിക്കറ്റുകൾ, യൂണിഫോം തുടങ്ങിയവയെല്ലാം കത്തി നശിച്ചു. സംഭവത്തിന് ശേഷം കടന്നു കളഞ്ഞ ഇയാൾ വീട്ടുപരിസരത്ത് എത്തിയെന്ന വിവരത്തെ തുടർന്ന് സ്ഥലത്തെത്തിയ നെടുപ്പുഴ പോലീസ് ഇയാളെ കസ്റ്റഡിയിൽ എടുക്കുകയായിരുന്നു. ബാബിബുരാജിനെതിരെ നെടുപ്പുഴ പോലീസ് സ്റ്റേഷനിൽ 5 കേസുകളും, തൃശൂർ ടൗൺ വെസ്റ്റ് സ്റ്റേഷനിൽ ഒരു കേസും ഉണ്ട്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
